இன்று சர்வதேச நட்பு தினம் : நட்பின் நாட்கள்... நண்பர்களின் ஞாபகங்கள்...

நட்பும் காதலைப் போன்றது தான். அழகு, அறிவு, அந்தஸ்து, பணம், பதவி, ஜாதி, மதம், இனம், மொழி வேறுபாடுகளைக் கடந்து, உள்ளத்தை மட்டும் நேசிக்கும் உயரிய பண்பு கொண்டது. சிலவகை நட்பு பால்ய பருவத்திலிருந்து தொடரும், சில நட்பு, பார்த்தவுடனே பல்லாண்டு பழகியதைப் போன்ற உணர்வைத் தரும். இன்னும் சிலவகை நட்பு முகம் அறியாமல், வாழ்க்கை முழுதும் தொடரும். நட்பிலும் சிறுசிறு சண்டை, ஊடல், கருத்து வேறுபாடுகள் உண்டு. அனைத்தையும் மறந்து மனதுக்குள் நட்பை நினைத்த மாத்திரத்தில், நண்பன் முகம் தெரிவது தான், சிறப்பு. எங்கோ ஒரு மூலையில் தொடர்பின்றி இருந்தாலும், பழைய குறும்புகளை அசைபோட்டு, அவ்வப்போது மனதுக்குள் சிரித்துக் கொள்ளும், இந்த நட்பிற்கு வானம் தான் எல்லை. இன்று சர்வதேச நட்பு தினம்.